Átján marka sigur Barcelona

Barcelona er enn með fullt hús stiga á toppi spænsku úrvalsdeildarinnar í handbolta eftir risasigur á Fertiberia Puerto Sagunto á útivelli í kvöld.

Lokatölur urðu 27-45, en staðan í hálfleik var 11-20, Barcelona í vil.

Landsliðsfyrirliðinn Guðjón Valur Sigurðsson skoraði þrjú mörk úr fjórum skotum, en markaskorið hjá Barcelona dreifðist vel þar sem allir útileikmenn liðsins nema einn komust á blað. Aitor Ariño Bengoechea var markahæstur í liði Börsunga með sex mörk.

Barcelona hefur unnið alla sex leiki sína í deildinni með miklum yfirburðum, en til marks um það er liðið með 90 mörk í plús.