Á móti sól með byr í seglin

Hljómsveitin Á móti Sól nýtur greinilega góðs af velgengni söngvarans, Magna Ásgeirssonar, sem hefur gert góða hluti í Rock Star: Supernova. Samkvæmt heimildum blaðsins hefur sala á plötum hljómsveitarinnar aukist meðfram sigurgöngu Magna og þá mun Sena vera íhuga að setja tvær plötur sem fyrirtækið gaf út árin 2001 og 2003 aftur í framleiðslu.

Þórir Gunnarsson, bassaleikarinn knái, var staddur í Los Angeles þegar Fréttablaðið náði tali af honum og spurði hann útí nýja sigurgöngu hljómsveitarinnar.

„Já, við höfum eitthvað frétt af þessu,“ sagði hann, augljóslega spenntur enda verða úrslitin í þættinum tilkynnt annað kvöld og þá kemur í ljós hvort meðlimir sveitarinnar þurfi að leita að nýjum söngvara.

„Við þurfum ef til vill að fara panta fleiri eintök,“ bætir hann við og hlær.

Þórir var „ættleiddur“ af fjölskyldu Magna í nokkra daga en henni var sem kunnugt er boðið til Los Angeles af Icelandair til að veita Magna stuðning á síðustu metrunum. „Við erum vonast til að hitta hann bráðum,“ bætir Þórir við en sagðist ekki vera farinn að örvænta ef Magna skyldi vera boðið gull og grænir skógar eftir að þátttöku hans lýkur. „Magni kemur bara til liðs við okkur þegar hann er laus.“

Heimir Eyvindarson, umboðsmaður og hljómborðsleikari Á móti sól, sagðist kannast við að sala á plötunni hefði aukist en ekki fjórfaldast eins og sumir fréttavefir hefðu haldið fram.

„Ef síðasta plata okkar hefði farið í 36 þúsund eintök væri ég búinn að frétta af því,“ sagði hann og hló, bætti því við að útlendingar væru hins vegar farnir að sýna sveitinni áhuga og hefðu jafnvel reynt að prjóna sig í gegnum íslenska heimasíðu sveitarinnar.

„Við höfum fengið mann til að þýða hana og hann ætti að vera búinn að klára verkefnið,“ bætti hann við.