Rafael Benitez, stjóri Liverpool, segist vera tilbúinn undir stórsókn Barcelona í kvöld þegar liðin mætast í síðari leik sínum í 16-liða úrslitum Meistaradeildarinnar á Anfield. Leikurinn verður sýndur beint á Sýn og hefst útsending klukkan 19:30.
"Barcelona verður að skora í það minnsta tvö mörk og því verða þeir í miklum sóknarhug. Ég á von á því að þeir spili með þá Ronaldinho, Eto´o og Messi í framlínunni og ég er tilbúinn fyrir það. Við leggjum upp með allt aðra hluti en við gerðum í fyrri leiknum," sagði Benitez.
