Crouch bjargaði Portsmouth

Tvö mörk frá Peter Crouch í framlengingu leiks Guimares og Portsmouth í Portúgal kom síðarnefnda liðinu í riðlakeppni UEFA-bikarkeppninnar í kvöld.

Portsmouth vann fyrri leikinn í Englandi, 2-0, og stóð því ágætlega fyrir leikinn í kvöld. Hins vegar skoraði portúgalska liðið tvívegis í fyrri hálfleik og varð það niðurstaðan eftir venjulegan leiktíma.

Þurfti því að framlengja leikinn og skoraði Crouch fyrst á 105. mínútu og svo aftur á 111. mínútu.

Fyrst skoraði Crouch með skalla eftir fyrirgjöf Glen Johnson og síðar með skoti eftir undirbúning Jermain Defoe.

Hermann Hreiðarsson sat á varamannabekk Portsmouth í kvöld.