Rut fer frá Team Tvis eftir sex ára dvöl

Rut Jónsdóttir, landsliðskona í handbolta, verður ekki áfram hjá danska liðinu Team Tvis í Holstebro.

Það kom fram í dönskum fjölmiðlum í dag en hún hefur einnig verið orðuð við dönsku meistarana í Midtjylland.

Rut er 23 ára gömul og hefur verið á mála hjá Team Tvis undanfarin sex ár en hún hefur lítið spilað í vetur eftir að hún meiddist á öxl á landsliðsæfingu í haust.

Þórey Rósa Stefánsdóttir fór frá Team Tvis eftir síðasta tímabil en þá urðu þær Evrópumeistarar með liðinu eftir sigur í EHF-bikarnum.