Telur það ekki í verkahring Alþingis að skipta sér af Borgunarmálinu

Nefndarmaður í efnahags- og viðskiptanefnd Alþingis segir það ekki í verkahring Alþingis að skipta sér af sölu Landsbankans af borgun. Horfið hafi verið frá pólitískum afskiptum af bönkum í ríkiseigu fyrir löngu síðan. Vísbendingar erum að að Borgun hf. hafi verið undirverðlagt þegar Landsbankinn seldi þriðjungshlut í fyrirtækinu án auglýsingar

Bankastjóri Landsbankans hefur verið boðaður á fund efnahags- og viðskiptanefndar á mánudag ásamt forstjóra Bankasýslu ríkisins og forstjóra Samkeppniseftirlitsins til að ræða sölu á þriðjungshlut bankans í greiðslukorta- og greiðslumiðlunarfyrirtækinu Borgun hf. Vilhjálmur Bjarnason telur þetta ekki í verkahring nefndarinnar.

„Ég velti fyrir mér hlutverki nefndarinnar. Löggjafarþingið hefur sett reglur um aðkomu ríkisins að eignarhaldi í bönkum og það er í gegnum Bankasýsluna sem fer með eigendahlutverk ríkisins í Landsbankanum. Mér finnst að það eigi að ræða þetta á vettvangi Bankasýslunnar að svo komnu máli,“ segir Vilhjálmur. Hann segir að horfið hafi verið frá pólitískum afskiptum af bönkum í ríkiseigu fyrir löngu síðan en hann telur þetta afturhvarf til þess tíma er Alþingi kaus bankaráð í bönkum ríkisins..



Eignir skattgreiðenda seldar án auglýsingar

Sala Landsbankans á þriðjungshlut í Borgun hf. hefur vakið mikla athygli og umtal vegna þess að bankinn er í eigu skattgreiðenda og það þykir almennt tilhlýðilegt að þegar verið er að selja eignir ríkisins að þær séu auglýstar til sölu áður. 

Röksemdir Steinþór Pálssonar bankastjóra í viðtali á hér á Stöð 2 og í tilkynningu frá bankanum fyrir þeirri ákvörðun að selja hlutinn í Borgun án auglýsingar eru einkum eftirfarandi: 

1. Landsbankinn hafði ekki aðstöðu til að afla upplýsinga um Borgun hf. sem áhrifalaus minnihlutaeigandi í fyrirtækinu.

2. Landsbankinn hefur haft mjög takmarkaðan aðgang að Borgun eða upplýsingum um fyrirtækið vegna sáttar sem gerð var við Samkeppniseftirlitið árið 2008.

3. Ríkar skyldur hvíla á bankanum við sölu eigna að veita sem bestar upplýsingar. Bankarnir voru harðlega gagnrýndir fyrir laka upplýsingagjöf við sölu á bréfum í Decode um síðustu aldamót.

4. Bankinn fékk gott verð fyrir hlutinn í Borgun að mati Steinþórs. 

Steinþór Pálsson þykir hafa staðið sig vel sem bankastjóri, viðmælendur fréttastofu segja hann vandvirkan og rekstur Landsbankans hefur verið stöðugur undir hans stjórn á erfiðum tímum.

Steinþór hefur hins ekki útskýrt hvers vegna Landsbankanum var ómögulegt að fela hlutlausum þriðja aðila að annast söluna á hlutnum í Borgun eða fá heimild Samkeppniseftirlitsins til að afla nauðsynlegra upplýsinga um verðmæti fyrirtækisins með það fyrir augum að miðla þeim upplýsingum til væntanlegra kaupenda. Eða eins og Árni Páll Árnason orðaði það í fréttum okkar í gær: 

„Mér segja fróðir menn að það sé hægt fyrir banka í þessari stöðu að fá utanaðkomandi ráðgjafa til að annast sölu eða koma á umgjörð svo upplýsingar séu tiltækar fyrir kaupendur svo bankinn fái ekki að sjá þær sjálfur.“

Vísbendingar um undirverðlagningu

Vefritið Kjarninn greindi frá því í dag að sterkar vísbendingar væru um að Borgun hf. hafi verið undirverðlagt þegar Landsbankinn seldi hlut sinn í fyrirtækinu samkvæmt viðurkenndum aðferðum við verðmat fyrirtækja.

Þegar önnur félög á Íslandi eru skoðuð, miðað við stöðu þeirra í árslok 2013, kemur líka í ljós í þeim samanburði að verðlagningin á Borgun er talsvert lág.