Tónlistarhátíðin All Tomorrows Parties, eða ATP, hefst í dag en þetta er í þriðja sinn sem hátíðin er haldin hér á landi. Á meðal þeirra sem koma fram í kvöld eru Belle and Sebastian og Iggy Pop.
ATP hátíðin var fyrst haldin árið 1999 í Camber Sands í Sussex í Englandi en nú er hátíðin haldin víða um heim, meðal annars í Ástralíu og Japan. ATP var fyrst haldin í Ásbrú í Keflavík árið 2013 við góðar viðtökur. Í ár sækja um fimm þúsund manns hátíðina heim, þar af rúmlega helmingurinn erlendir gestir.
Á ATP er sérstök kvikmyndadagskrá órjúfanlegur hluti af hátíðinni en í ár verður það hljómsveitin Mogwai sem stýrir dagskránni í tilefni tuttugu ára afmælis hljómsveitarinnar sem kom einmitt fram á hátíðinni síðasta ár. Sveitin er vel kunnug kvikmyndaforminu en meðlimir hennar hafa samið tónlist fyrir hinar ýmsu kvikmyndir í gegnum tíðina.
Formleg dagkrá ATP á íslandi hefst klukkan tólf í dag og stendur fram á nótt en reglulegar rútuferðir verða á milli BSÍ og hátíðarsvæðisins. Fjörtíu og tvær hljómsveitir koma fram á ATP í ár á þremur sviðum á gamla hersvæðinu í Ásbrú. Á meðal þeirra sem koma fram eru HAM, Ghostdigital, Public Enemy, Run The Jewels,Swans, Iggy Pop og Belle And Sebastian.
Keflavík
Haukar
