Ytri Rangá aflahæst laxveiðiánna

Nýjar vikutölur um aflabrögð í laxveiðiánum voru birtar í gærkvöldi og af þeim má ráða að ennþá er veiðin ágæt í ánum.

Hún er að vísu meira en ágæt í sumum ánum og sem dæmi um það veiddust 507 laxar í liðnni viku í Miðfjarðará en hún er komin í 5485 laxa en það toppar ekkert vikuveiðina í Ytri Rangá en þar veiddust 978 laxar í vikunni og má þar að mestu þakka að maðkveiðin byrjaði 4. september en fram að því hafði veiðin engu að síður verið hreint út sagt frábær. Heildarveiðin í Ytri Rangá er komin í 6609 laxa og ennþá eru sex vikur eftir af veiðitímanum þar.

Blanda skilaði 127 löxum á land, Norðurá var með 406 laxa vikuveiði sem er ótrúlega góð tala í henni en hún þykir yfirleitt detta í frekar rólegn gír eftir miðjan ágúst. Eystri Rangá gaf 144 laxa í vikunni, Þverá/Kjarrá 154 laxa og svo Langá með 146 laxa á land í liðinni viku.

Fyrstu lokatölurnar eru komnar og þær eru úr Norðurá með 2886 laxa í sumar sem er feyknagott ár í ánni. Straumarnir gáfu 339 laxa á sínar tvær stangir sem er fín veiði og aðeins yfir meðaltali. Það er samkvæmt vikulistanum frá Landssambandi Veiðifélaga ennþá fín veiði í flestum ánum og ennþá á eftir að veiða í um það bil tvær vikur í viðbót svo þessar tölur gætu enn hækkað.