Elskar orku og eldmóð áhorfenda

„Ég elska Ísland,“ segir guðmóðir pönksins, Patti Smith, í upphafi viðtals, en hún sækir Ísland heim í ágúst, heldur tónleika og mun meðal annars flytja plötuna Horses í heild sinni.

Hrifin af íslenskum hestum

„Ég kom fyrst til Íslands árið 1969 með systur minni, við vorum mjög ungar og vorum ekki með mikið af peningum svo við vissum ekki hvað við ættum að gera en okkur fannst landið mjög fallegt,“ segir Smith glöð í bragði.

Tónlistarkonan hefur komið nokkrum sinnum hingað til lands eftir þessa fyrstu heimsókn og segist elska landið, fólkið og er sérstaklega hrifin af íslenska hestinum. Hún hefur haldið nokkra tónleika hérlendis, síðast árið 2014 þegar hún kom fram ásamt Björk á náttúruverndartónleikum og eftirminnilegt er þegar hún tróð óvænt upp ásamt leikaranum Russel Crowe sumarið 2012.

Smith mun eyða nokkrum dögum hér á landi eftir tónleikana og er sérstaklega spennt fyrir því að fara á hestbak. „Ég vil fara á hestbak og heimsækja gröf Bobby Fischer, ég hef farið þangað áður en ég mun fara aftur með blóm. Fara út á land og skoða mig um þar.“

Horses í heild sinni

Platan Horses kom út árið 1975 og fagnar því 40 ára afmæli í ár og er fyrsta plata Smith sem mun heiðra þennan frumburð sinn á tónleikunum. Platan hafði mikil áhrif á pönk-rokk senuna í New York og prýðir meðal annars 44. sæti yfir 500 bestu plötur sögunnar að mati tímaritsins Rolling Stone og er meðal 100 bestu platna allra tíma samkvæmt tímaritinu Time.

Ásamt Smith á sviðinu verða tveir upprunalegir meðlimir hljómsveitarinnar, þeir Lenny Kaye og Jay Dee Daugherty, ásamt bassa- og hljómborðsleikaranum Tony Shanahan og segir hún þau munu verða trú hljómi plötunnar á tónleikunum. „Ég er stolt yfir að koma fram ásamt hljómsveitinni. Ég er stolt af því að við erum heilsuhraust og höfum verið vinir í fjörutíu ár. Við eigum svo langa sögu og munum koma með þessa sögu og vináttu okkar upp á sviðið,“ segir Smith og segir það jafnframt bæði ögrandi og spennandi að flytja plötuna á tónleikum frá A til Ö. „Við lofuðum Horses, en við erum ekki hljómplata, við erum rokkhljómsveit en við munum spila hana frá fyrsta til síðasta lags,“ segir hún og bætir við: „Fyrsta lagið á plötunni er Glory, venjulega þegar þú ferð á svið byrjar þú á einhverju lágstemmdara og byggir upp, en við verðum að vera tilbúin til þess að flytja það strax. Það er áskorun, en jákvæð áskorun.“

Elskar þegar fólk syngur með

„Það er spennandi að fara í gegnum Horses með fólkinu og mér finnst frábært þegar fólk syngur með. Fólkið eru tónleikarnir, orkan sem það sendir og eldmóðurinn. Þegar fólk syngur Break it up fyllir það mig af tilfinningum,“ segir hún ánægð og hvetur íslenska aðdáendur til þess að hefja upp raust sína í Hörpu þann 17. ágúst næstkomandi.

Smith er ásamt bandi sínu á tónleikaferðalagi og spilaði meðal annars á Glastonbury-hátíðinni í júní síðastliðnum. Þar fékk hún Dalai Lama upp á svið og flutti ásamt áhorfendaskaranum afmælissönginn fyrir trúarleiðtogann. Tónleikaferðalaginu lýkur á Íslandi sem er tilviljun sem Smith fagnar, en þau skoðuðu nokkur tilboð áður en ákveðið var að lokatónleikarnir yrðu í Hörpu og segir hún þá ákvörðun ekki byggða á peningum heldur ást.

„Þetta er fullkominn staður til þess að enda tónleikaferðina, ég get fagnað með því að ríða á hestbaki inn í sólsetrið,“ segir hún og hlær.