Fín veiði í frábæru veðri á fyrstu vakt í Laxá í Mý

Veiði hófst í Laxá í Mývatnssveit í morgun í gullfallegu veiðiveðri og það er ekki annað að heyra en veiðimenn séu sáttir.

Ef veðurskilyrðin eru góð og veiðin ofan í það líka eru veiðimenn kátir það er nokkuð ljóst og það eru kátir veiðimenn sem hafa látið heyra í sér í morgun ofan úr Laxá í Mývatnssveit en veiðin þar í morgun hefur verið með ágætum.  Það er alltaf mikil spenna fyrir þessari opnun og ekki var það öðruvísi núna þar sem veiðimenn og aðrir hafa haft áhyggjur af Laxá sökum þörungablómans í vatninu sem litar líka ánna og oft þannig að þurrfluguveiði verður gagnslaus.

Einhver litur var á ánni í morgun en ekki þannig að það gerði veiðin erfiða.  Fiskurinn í ánni kemur vel undan vetri og er greinilega búinn að vera í mjög góðu æti síðustu daga eftir að það hlýnaði.  Við bíðum frétta úr Laxárdal en veiðimenn vona að veiðin þar verði betri en hún var í fyrra.  Það skal þó segja að þrátt fyrir minni afla var meðalþyngdin úr dalnum mjög góð í fyrra, líklega ein sú besta sem mælst hefur.