29 laxa holl í Vatnsdalsá með 101 sm lax

Stórlaxarnir eru farnir að vera sífellt fleiri í ánum og það sést vel á veiðitölum í laxveiðiánum þar sem allt er á fullum snúningi þessa dagana.

Þrátt fyrir að takan detti niður af og til og sumar vaktirnar í ánum séu ekkert sérstakar verður ekki sagt að það sé laxleysi um að kenna því það er góður gangur í laxagöngum og stóri júlí straumurinn sem yfirleitt skilar stórum göngum yfir nokkura daga tímabil ennþá viku í burtu.  Það eru góðar fréttir af öllu landinu og sérstaklega er gaman að sjá hvað árnar á norðurlandi eru að taka við sér snemma og skila flottum tölum í veiðibækurnar.

Holl sem var að ljúka veiðum í Vatnsdalsá landaði 29 löxum og missti töluvert eins og gengur og gerist en þar á bæ er lax kominn um alla á og í því magni sem veiðimenn eiga helst að venjast í júlí.  Það virðist því stefna í sömu söguna þar á bæ eins og víðar, veiðimenn eru farnir að horfa í að þetta sé líklega að stefna í gott sumar.  Vatnsdalsá er þekkt fyrir sína stórlaxa og í þessu holli var það engin undantekning en stærsti laxinn sem kom á land var 101 sm.  Nokkrir slíkir hafa verið að sýna sig í ánni frá opnun og er þeirra dvalarstaður í ánni helst sá vel þekkti veiðistaður Hnausastrengur.