Vatnsleysi gerir laxveiðina erfiða

Það er ekki loku fyrir það skotið að veiðimenn séu orðnir frekar þreyttir á vatnsleysinu sem hrjáir laxveiðiárnar.

Þessu er að vísu misskipt en ástandið er að verða og er þegar orðið verst á vesturlandi en margar árnar þar eru orðnar svo vatnslitlar að aðeins dýpstu veiðistaðirnir eiga möguleika á að halda fiski og sá fiskur sem finnur sér djúpan hyl er ekki að taka.  Þetta sést vel á vikutölunum en 60-90 laxa vikur á bestu ánum á vesturlandi lýsir ástandinu þar vel.

Það er ekki um laxleysi að kenna enda sést það vel þegar dýpstu hyljirnir eru skoðaðir að þar safnast laxinn saman í torfum og tekur auðvitað ekkert.  Vatnið er bæði lítið, súrefnislítið, heitt og "flatt" en þá eru litlar sem engar líkur á að lax taki.  Til að toppa þetta síðan allt saman hefur verið brakandi sumarblíða á vesturlandi svo dögum skiptir og það hefur engin veiðimaður óskað sér sólskins í veiðiskap að okkur vitandi.  Einhver rigning er í kortinum en það þarf miklu meira en einn tvo daga.  Til að vatnið hækki að einhverju ráði þarf að rigna hressilega í nokkra daga og það er ljóst að þeir veiðimenn sem verða við bakkana þegar það gerist verða í góðum málum.