Anthony Martial, framherji Manchester United, er ósáttur með eigin frammistöðu á EM í Frakklandi í sumar.
Martial sló í gegn með United á síðasta tímabili en fann sig ekki á EM og spilaði aðeins 69 mínútur á mótinu.
„Þetta var mjög erfitt mót. Okkur mistókst að vinna titilinn og þjálfarinn [Didier Deschamps] notaði mig lítið - þetta var frekar mikil hörmung,“ sagði Martial.
Hann var í byrjunarliðinu Frakka gegn Albaníu í öðrum leiknum í riðlakeppninni en var tekinn af velli í hálfleik. Hann var ekki oftar í byrjunarliðinu á mótinu.
„Ég var settur á bekkinn eins og gerist. Ég er ungur og ætla að læra af þessu,“ sagði Martial sem vill ekki nota mikið leikjaálag með United sem afsökun fyrir slakri frammistöðu.
„Þetta var í fyrsta sinn sem ég spilaði svona mikið fyrir mitt félagslið en það er engin afsökun. Ég hefði átt að standa mig betur.“
Hinn tvítugi Martial var í byrjunarliði Frakka í vináttulandsleik gegn Ítalíu á fimmtudaginn og þakkaði traustið með sínu fyrsta landsliðsmarki.
Það verður því að teljast líklegt að Martial haldi stöðu sinni í byrjunarliði Frakka fyrir leikinn gegn Hvít-Rússum í undankeppni HM 2018 á þriðjudaginn.
