Gæsaveiðin gengur vel hjá þeim skyttum sem við höfum verið í sambandi við og lægðir og rok í spánni er nákvæmlega veðrið sem gæsaskyttur vilja fá.
Það er erfitt að eiga við fuglinn þegar það er heiðskýrt og sól enda verður gæsin stygg við þessar aðstæður og það getur oft verið erfitt að fá hana niður í gervigæsirnar. Rok, skýjað og smá rigning er í kortunum og það kætir skyttur landsins sem liggja í skurðum þessa dagana því það er það sem gerir fyrirsát í ökrum og túnum auðveldari. Gæsin fær það sem er kallað stýrivindur en það er stöðug vindátt úr einni átt og helst nokkuð kröftug. Þá kemur fuglinn upp í vindinn og mjög ákveðið niður í túnið eða akurinn.
Það er mikið af gæs komin niður á tún og akra fyrir norðurlandi og einnig er hún farin að hópast saman á suður og vesturlandi. Besti tíminn stendur yfir fram í byrjun nóvember en þá er svo til eingöngu verið að skjóta grágæs. Heiðagæsin er sú bráð sem mest er sótt í á þessum tíma en hún fer fyrst gæsa af landi brott en hún er öllu jöfnu talin mun betri matfugl enda mikið villibragð af henni, mun meira en yfirleitt á grágæs.
