„Þetta byrjaði í apríl í fyrra, ég fékk smá hugmynd um verkefni sem sneri að því að fegra Hellissand með því að taka gamla frystihúsið og breyta því í útilistaverkagallerí.“
Kári segir að gamla frystihúsið hafi verið svolítið út undan í bænum eftir að eldur kviknaði í því fyrir nokkru og ekki litið vel út. „Ég fékk 10 vegglistamenn til að koma hingað alls staðar að úr heiminum og fríska aðeins upp á það,“ en Kári segir að þau hafi endað með yfir 30 verk í plássinu lista- og heimamönnum til mikillar ánægju.

„Mig langaði að gera þetta aðeins yfirgripsmeira og svolítið fjölbreyttara.“
Kári lýsir því að öllum hafi verið frjálst að sækja um þátttöku og því hafi umsóknir borist frá öllum heimshornum. Á hátíðinni verða meðal annars listamenn frá Argentínu, Ísrael, Ástralíu og fleiri löndum. „Við erum með mjög mikla fjölbreytni á götuhátíðinni og erum til dæmis með leik- og danssýningar og dansnámskeið með krökkunum í Snæfellsbæ.“
Búast má við lifandi stemningu úti um allan bæ þar sem listakonan Nula verður með húlahringjasýningu og hægt verður að taka þátt í karíókí. Einnig verður á staðnum bílskottssala þar sem hægt verður að grúska í skottum og gætu þar leynst ýmsar gersemar.

„Það er klárt mál að öll þjónustufyrirtæki í Snæfellsbæ munu njóta góðs af þessu segulstáli,“ bætir hann við og tekur sérstaklega fram að Markaðsstofa Vesturlands muni græða á framtakinu. Markaðsstofan strokaði nýlega þorpið Rif út af götukorti sínu. Rif er staðsett á milli Hellissands og Ólafsvíkur og þar búa tæplega 200 manns.
„Rif hefur alltaf verið inni á þessu götukorti,“ segir Kári en hann segir ástæðu eyðingar þorpsins af kortinu vera þá að hann vildi ekki kaupa auglýsingu af markaðsstofunni í ár. „Ég finn mikið til með fólkinu sem býr í Rifi, það er allt í einu búið að stroka það bara út.“ En Kári segir Rif lengi hafa verið vinsælan stað fyrir bæði fugla- og fornminjaskoðun.
„Það er fullt annað inni í Rifi heldur en bara ég og mitt leikhús svo þetta eru alveg fáránleg vinnubrögð.“

Lunginn úr hátíðarhöldunum verður þó á Hellissandi en aðspurður segir Kári einn af aðalviðburðunum vera Cardiophone eftir Moran Duvshani frá Ísrael. Hann segir heimamenn hjálpa við að framkvæma verkið og lýsir áhorfendum sem eins konar tilraunadýrum. „Þetta er þátttökusýning þar sem Moran tekur einn áhorfanda í einu í hjartalínurit og breytir því tónverk,“ en Kári lýsir verkinu sem öðruvísi upplifun fyrir alla.
Kári segir kjörið fyrir fjölskylduna að næla sér í sitt eigið hjartatónverk í góða veðrinu á Hellissandi um helgina. „Þetta er tveggja daga festival og okkur langar til að skapa stemningu þar sem fólk getur bara rölt á milli staða og látið koma sér á óvart.“ Sirkus Íslands verður á svæðinu og hægt að grennslast fyrir um kynstrin öll í tjöldum sem verður komið fyrir af heimamönnum við ána á Hellissandi. „Þar getur fólk prófað alls konar rugl,“ en Kári segir að það verði til að mynda spákona í einu tjaldinu.
„Við erum bara að reyna að hafa þetta heimilislegt og fjölskylduvænt og fyndið og skemmtilegt, allt í senn,“ segir Kári sem mælir með að fólk kíki í heimsókn á fyrstu götulistahátíð Hellissands 21. og 22. júní.