Loic Nego kom Ungverjalandi til bjargar í gærkvöld með jöfnunarmarki undir lokin gegn Íslandi. Ef leikurinn hefði farið fram í mars, líkt og til stóð, hefði Nego ekki mátt spila.
„Þetta kvöld gæti ekki verið stórkostlegra! Ég vona að stuðningsmennirnir séu stoltir því liðið á þetta skilið. Ég er himinlifandi að vera hérna sem fulltrúi Ungverjalands. Hér hef ég búið lengi með minni fjölskyldu og fyrir mér er þetta svo sannarlega mitt heimili,“ sagði Nego í skýjunum eftir 2-1 sigur Ungverja á Íslandi í gær. Sigur sem skilaði Ungverjalandi á EM.
Þegar Ungverjum virtust allar bjargar bannaðar jafnaði Nego metin af stuttu færi á 88. mínútu, eftir að hafa aðeins verið inni á vellinum í nokkrar mínútur. Íslenska liðið fór þá úr skotgröfunum og Dominik Szoboszlai skoraði sigurmark Ungverja í blálokin. Mark Negos má sjá hér að neðan.
Aðeins er mánuður síðan að Nego lék sinn fyrsta landsleik fyrir Ungverja, í undanúrslitaleiknum gegn Búlgaríu.
Reglum FIFA breytt og Nego lék fyrsta landsleik fyrir mánuði
Nego, sem er 29 ára, er fæddur og uppalinn í Frakklandi og á að baki fjölda leikja fyrir yngri landslið Frakka. Hann fluttist fyrst til Ungverjalands fyrir sjö árum og gekk til liðs við Újpest, liðið sem Aron Bjarnason er á mála hjá. Nego fór svo um tíma til Charlton á Englandi en hefur verið leikmaður Fehervar í Ungverjalandi frá árinu 2015.
Nego fékk ungverskan ríkisborgararétt í fyrra en þá var reyndar ekki í spilunum að hann myndi spila fyrir landslið Ungverja. Reglur FIFA bönnuðu það nefnilega, vegna leikja sem hann hafði spilað með unglingalandsliðum Frakka.
Reglum FIFA var hins vegar breytt núna í haust og þess vegna gat Marco Rossi kallað á Nego í sinn landsliðshóp í síðasta mánuði. Það reyndist ákvörðun upp á EM-sæti og einn og hálfan milljarð króna, ef svo má segja.
Upphaflega áttu umspilsleikirnir að fara fram í mars, þegar Nego var ekki kominn með leikheimild, en þeim var frestað vegna kórónuveirufaraldursins.
