Elon Musk, framkvæmdastjóri Tesla hélt þessu fram á hluthafafundi Tesla sem fram fór á dögunum. Eins og staðan er núna er Toyota Corolla mest seldi bíll heims, um 1.150.000 eintök voru seld á síðasta ári. Til samanburðar seldi Tesla 936.222 bíla samtals á síðasta ári, þar eru taldar með allar undirtegundir framleiðandans.
Tesla er stöðugt að auka sölu á sínum bílum og spár gera ráð fyrir að Tesla selji um 1,3 milljón eintaka á þessu ári. Þrátt fyrir erfiðleika með að skaffa íhluti vega innrásar Rússlands í Úkraínu og faraldur kórónaveirunnar.
Eins og er gefur Tesla einungis upp opinberlega samanlagðar sölutölur Model 3 og Model Y sem gerir erfitt fyrir að rýna í nákvæmar tölur. En með Gígaverksmiðjunni í Berlín er Tesla að auka framleiðslugetu til muna. Sú verksmiðja mun eingöngu framleiða Model Y. Evrópskar pantanir munu því verða afgreiddar hraðar en áður. Það er því útlit fyrir að Model Y gæti orðið söluhæsta bifreiðin í heiminum á næsta ári.
