Fótbolti

Úlfur skoraði í fyrsta leiknum fyrir Bládjöflana

Ingvi Þór Sæmundsson skrifar
Úlfur Ágúst Björnsson var drjúgur fyrir FH meðan hans naut við.
Úlfur Ágúst Björnsson var drjúgur fyrir FH meðan hans naut við. vísir/diego

Úlfur Ágúst Björnsson var ekki lengi að stimpla sig inn hjá Duke háskólanum í Bandaríkjunum. Hann skoraði í sínum fyrsta leik fyrir fótboltalið skólans.

Úlfur skoraði níu mörk í nítján leikjum í deild og bikar með FH áður en hann hélt út til Duke.

Hafnfirðingurinn var í byrjunarliði Duke þegar liðið mætti Princeton í nótt. Staðan var markalaus í hálfleik en á 49. mínútu kom Úlfur Bláu djöflunum yfir.

Sjö mínútum síðar bætti Wayne Frederick öðru marki við. Fleiri urðu mörkin ekki og Duke vann góðan 2-0 sigur. Úlfur lék fyrstu 65 mínútur leiksins.

Úlfur er ekki eini Íslendingurinn sem lætur að sér kveða með fótboltaliði Duke. Þorleifur Úlfarsson skoraði nítján mörk fyrir Duke fyrir tveimur árum og var í kjölfarið valinn af Houston Dynamo með fjórða valrétti í nýliðavali MLS-deildarinnar.

Bandaríski fótboltinn

Mest lesið


Fleiri fréttir

Sjá meira


×

Mest lesið