Þetta kom fram í Íslandi í dag á Stöð 2 í gærkvöldi en Vala Matt hitti þau hjónin og ræddi málið við þau. Í innslaginu segja þau að gestir þeirra þurfi að greiða 600 krónur á tímann í stöðumæli alla daga vikunnar frá því á morgnana til klukkan níu á kvöldin, einnig á laugardögum og sunnudögum.

„Við búum í 101 á Grettisgötunni og erum með stæði sem við eigum á okkar lóð sem þýðir að við sleppum með mesta straffið frá borginni. En þetta er stundum svolítið erfitt ef maður er að fá gesti eða iðnaðarmenn,“ segir Ólafur og heldur áfram.

„Ef fólk ætlar ekki að borga sex hundruð krónur á klukkustund og vera bara í heimsókn í þrjár klukkustundir þá þarf það að leggja niðri á Lindargötu eða upp á Óðinstorg sem eru svona sex til sjö hundruð metrum í burtu.

Færa bílinn eftir þrjár klukkustundir

„Ef þú kemur í matarboð og ert á bíl því það er ógeðslega vont veður þá þarft þú að fara úr matarboðinu eftir þrjá tíma og flytja bílinn á annað svæði því það er líka búið að lengja tímann til níu á kvöldin,“ segir Ester en bílar mega bara vera lagðir á Grettisgötunni í þrjá klukkutíma og þá þarf að fjarlægja þá og flytja í annað gjaldsvæði nokkrum götum frá.

„Svo mega gestir okkar ekki leggja bílnum sínum fyrir aftan okkar bíl við okkar stæði. Ég var með pípara um daginn og ég bauð honum að leggja fyrir aftan minn bíl, hann var bara sektaður,“ segir Ólafur.

Vala ræddi einnig við formann umhverfis og skipulagsráðs Reykjavíkur Dóru Björt Guðjónsdóttur. Hún var spurð af hverju íbúar fengu aðeins eitt íbúakort við svæðið.

„Þetta eru reglurnar eins og staðan er í dag en það er verið að skoða hvort hægt sé að rýmka reglurnar. Þegar það er verið að byggja í dag er miðað við eitt stæði á hvert heimili og það er verið að vinna með þann ramma hjá okkur þarna,“ segir Dóra.

„Gjaldskyldan á þessu svæði er auðvitað alveg í miðborginni og í kringum Laugaveginn. Ég veit að það eru skiptar skoðanir með þessar reglur en þess vegna erum við að rýna í það hvort við teljum að það sé ástæða til þess að skapa enn meira svigrúm til að mæta þessum þörfum.“

Hér að neðan má sjá innslagið í heild sinni.