Fótbolti

Vinicius Junior klikkaði á víti og Real Madrid tapaði

Óskar Ófeigur Jónsson skrifar
Vinicius Junior gat komið Real Madrid í 1-0 á þrettándu mínútu en Giorgi Mamardashvili varði víti frá honum.
Vinicius Junior gat komið Real Madrid í 1-0 á þrettándu mínútu en Giorgi Mamardashvili varði víti frá honum. Getty/Florencia Tan Jun

Alveg eins og Arsenal fyrr í dag þá tapaði Real Madrid mikilvægum stigum í toppbaráttunni nokkrum dögum áður en liðin mætast síðan á þriðjudagskvöldið í átta liða úrslitum Meistaradeildarinnar í fótbolta.

Arsenal gerði jafntefli á útivelli í sínum leik í hádeginu en það gekk enn verr hjá Real mönnum sem töpuðu 2-1 á heimavelli á móti Valencia í spænsku deildinni.

Real Madrid er þar með þremur stigum á eftir toppliði Barcelona en Börsungar eiga auk þess leik inni.

Valenica var aðeins í sextánda sæti deildarinnar fyrir leikinn en liðið hefur verið á uppleið síðustu vikur.

Mouctar Diakhaby kom Valenica í 1-0 með skallamarki á 15. mínútu en aðeins tveimur mínútum fyrr hafði Vinicius Junior klikkaði á víti.

Þetta var önnur vítaspyrnan í röð sem Vinicius Junior klikkar á í búningi Real og honum tókst heldur ekki að nýta síðustu vítaspyrnuna sína með brasilíska landsliðinu.

Giorgi Mamardashvili, markvörður Valencia, varði vítið frá Vinicius í dag en Georgíumaðurinn er í láni hjá spænska félaginu frá Liverpool.

Real tókst þó að jafna metin á 50. mínútu og það mark skoraði umræddur Vinicius Junior eftir undirbúning Jude Bellingham. Bellingham framlengdi horn Luka Modric og Vinicius skoraði af stuttu færi.

Real Madrid fór mjög illa með færin í kvöld en liðið var með 3,24 í Xg, sem eru áætluð mörk.

Leikmenn liðsins reyndu nítján skot en allt kom fyrir ekki. Sigurmarkið datt ekki inn og dýrmæt stig runnu frá þeim. Þeir misstu síðan á endanum öll stigin.

Valencia gerði nefnilega daginn enn verri fyrir spænska stórliðið þegar Hugo Duro skallaði inn sigurmarkið á fimmtu mínútu í uppbótatíma. Mjög óvæntur 2-1 sigur Valencia á Real Madrid á Bernabeu var því staðreynd.




Fleiri fréttir

Sjá meira


×