Leikjavísir

GTA 6 velti Deadpool og Wolverine úr sessi

Samúel Karl Ólason skrifar
Jason Duval, önnur söguhetja GTA 6.
Jason Duval, önnur söguhetja GTA 6. Rockstar

Forsvarsmenn Rockstar ákváðu á dögunum að fresta útgáfu Grand Theft Auto 6 um meira en hálft ár. Eftirvæntingin er gífurleg og sést það glögglega á því hve margir horfðu á stiklu sem birt var skömmu eftir að tafirnar urðu opinberar. Sú stikla er sögð hafa sett nýtt met.

Á fyrsta sólarhringnum fóru áhorfstölur stiklunnar upp í 475 milljónir, á öllum efnisveitum.

Þetta segja forsvarsmenn Rockstar, í samtali við Hollywood Reporter, vera nýtt met og eiginlega rúst á gömlu meti stiklu Deadpool og Wolverine, sem fór í 365 milljónir áhorfa á fyrsta sólarhringnum.

Lagið Hot Together, eftir Pointer Sisters, var einnig í stiklunni en frá Spotify fengu blaðamenn HR þær upplýsingar að spilun á laginu hefði rokið upp um heil 182 þúsund prósent eftir að stiklan var fyrst birt.

Fyrsta stikla GTA 6 fór í 93 milljónir á fyrsta sólarhringnum.

Fimmti leikurinn í seríunni vinsælu kom fyrst út árið 2013 og þá á PlayStation 3. Hann hefur nokkrum sinnum verið endurgerður og uppfærður en Rockstar hefur malað gull á leiknum. Þó nokkur ár eru síðan hann varð arðvænasta skemmtanaafurð sögunnar.

Financial Times sagði frá því í desember að samkvæmt áætlunum Take Two, útgefanda GTA, yrðu tekjur af sölu leiksins og netspilun um 3,2 milljarðar dala. Það samsvarar um 412 milljörðum króna.

Sérfræðingar fyrirtækisins búast við því að fyrirtækið muni fá meira en milljarð dala með forsölu.

Hvað framleiðsla leiksins hefur kostað og mun kosta, auk auglýsingaherferðar og annars kostnaðar liggur ekki fyrir. Áætlanir hafa verið allt frá átta hundruð milljónum dala og upp í tvo milljarða.

Áætlað er að tekjurnar af GTA 5 frá því hann kom fyrst út, slagi í tíu milljarða dala.


Tengdar fréttir

Ný stikla úr GTA VI

Ný stikla úr tölvuleiknum Grand Theft Auto VI leit dagsins ljós í dag. Á örfáum klukkustundum hafa tugir milljóna horft á stikluna. Fyrirhugað er að leikurinn verði gefinn út 26. maí árið 2026.

Biðin langa: Rúmt ár í herlegheitin

Grand Theft Auto VI er loks kominn með útgáfudag og á hann að koma út þann 26. maí á næsta ári. Til stóð að leikurinn kæmi út á þessu ári en í tilkynningu frá útgáfufélaginu Rockstar er beðist velvirðingar á því að útgáfa hann hafi tafist.






Fleiri fréttir

Sjá meira


×


Tarot dagsins

Dragðu spil og sjáðu hvaða spádóm það geymir.