Fótbolti

„Gengur kannski illa að vinna leiki en við vinnum bara réttu leikina“

Hjörtur Leó Guðjónsson skrifar
Þorsteinn Halldórsson landsliðsþjálfari Íslands.
Þorsteinn Halldórsson landsliðsþjálfari Íslands. Vísir/EPA

„Fyrirfram hefði þetta verið ásættanlegt,“ sagði Þorsteinn Halldórsson, þjálfari íslenska kvennalandsliðsins í knattspyrnu, eftir 1-1 jafntefli gegn Noregi í Þjóðadeildinni í viðtali við RÚV kvöld.

„En miðað við hvernig staðan var þá var þetta svekkjandi að missa þetta frá okkur. Það er ekkert við því að gera. Fyrri hálfleikur var mjög góður fannst mér, en svo kom smá kafli í seinni þar sem þær lágu á okkur. Besta færið þeirra var kannski út af mistökum hjá okkur. Við lágum neðarlega og áttum í smá basli með að spila okkur út úr vörninni, en hægt og rólega fundum við taktinn.“

Þá segir Þorsteinn að íslensku stelpurnar hafi verið hættulegar stærstan hluta leiksins.

„Við vorum líklegar allan leikinn og vorum að komast í fínar stöður. Þegar við komumst í sóknir fannst mér við alltaf vera líklegar til að skora. Maður hafði alltaf trú á því að við myndum bæta við öðru marki. Svona er þetta bara. Það gengur kannski illa að vinna leiki núna en við vinnum bara réttu leikina.“

Íslensku stelpurnar mæta Frökkum í næsta leik og Þrosteinn horfir björtum augum á það verkefni.

„Það var vinnsla í þessu í kvöld og kraftur og öryggi. Við lögðum allt í þetta úti á velli og stelpurnar hlupu úr sér lungun og börðust um alla bolta. Það er alltaf grundvallaratriði sem við gerðum vel og við getum tekið margt gott úr þessu fyrir næsta leik,“ sagði Þorsteinn að lokum.




Fleiri fréttir

Sjá meira


×