Fótbolti

Spán­verjar héldu toppsætinu og stelpurnar hennar Betu komust í umspilið

Óskar Ófeigur Jónsson skrifar
Claudia Pina átti draumainnkomu í spænska landsliðið í dag. Spænsku stelpurnar voru undir þegar henni var skipt inn á völlinn en hún skoraði tvívegis og tryggði liði sínu sigurinn.
Claudia Pina átti draumainnkomu í spænska landsliðið í dag. Spænsku stelpurnar voru undir þegar henni var skipt inn á völlinn en hún skoraði tvívegis og tryggði liði sínu sigurinn. Getty/David Ramos

Heimsmeistarar Spánverja tryggðu sér í kvöld sæti í fjögurra þjóða úrslitamóti Þjóðadeildar kvenna en það gerðu þær með því að vinna Englendinga í úrslitaleik síns riðils.

Heimsmeisturum Spánar nægði jafntefli á heimavelli á móti Evrópumeisturum Englendinga en þær unnu leikinn 2-1.

Enska liðið komst yfir á 21. mínútu með marki Alessiu Russo og þau úrslit hefðu skilað liðinu í úrslitin.

Ensku stelpurnar voru yfir fram á 60. mínútu þegar Claudia Pina jafnaði metin.

Pina tryggði spænska liðinu sigurinn með sínu öðru marki aðeins tíu mínútum síðar.

Pina kom inn á sem varamaður á 58. mínútu og tókst að snúa leiknum á aðeins tólf mínútum.

Elísabet Gunnarsdóttir stýrði belgíska liðinu til frábærs sigurs á Portúgal í hreinum úrslitaleik um þriðja sæti riðilsins og þar með um að sleppa við fall.

Belgarnir voru í botnsætinu fyrir leikinn en tryggðu sér þriðja sætið með 3-0 útisigri.

Justine Vanhaevermaet kom Belgum í 1-0 á 36. mínútu og Tessa Wullaert bætti síðan við marki úr vítaspyrnu á 67. mínútu. Wullaert var ekki hætt og innsiglaði sigurinn með sínu öðru marki á 72. mínútu.

Belgía verður því í umspilinu um að halda sæti sínu í A-deildinni en Portúgal er fallið í B-deild.




Fleiri fréttir

Sjá meira


×