Fótbolti

Segir að eitrað hafi verið fyrir leik­mönnum liðsins

Óskar Ófeigur Jónsson skrifar
Jesse Marsch segir að það geti ekki lengur verið tilviljun þegar leikmenn MLS liða veikjast annað árið í röð fyrir úrslitaleik Meistaradeildarinnar.
Jesse Marsch segir að það geti ekki lengur verið tilviljun þegar leikmenn MLS liða veikjast annað árið í röð fyrir úrslitaleik Meistaradeildarinnar. Getty/Omar Vega

Jesse Marsch, þjálfari kanadíska landsliðsins í fótbolta, heldur því fram að eitrað hafi verið fyrir leikmönnum kanadíska liðsins Vancouver Whitecaps í keppnisferð þeirra til Mexíkó.

Vancouver Whitecaps flaug suður á bóginn að spila í úrslitaleik Meistaradeild Norður- og Mið-Ameríku en tapaði 5-0 í úrslitaleiknum á móti Cruz Azul.

Fjöldi leikmanna og starfsmanna Whitecaps sýndu einkenni matareitrunar í ferðinni.

Félagið sjálft vill þó meina að þessi einkenni hafi komið fram eftir leikinn og eru ekki sammála landsliðsþjálfaranum að einhver hefði eitrað fyrir liðinu. ESPN segir frá.

Þetta er samt annað árið í röð sem veikindi koma upp hjá bandarísku liði í tengslum við ferð til Mexíkó í úrslitaleik Meistaradeildarinnar. Nokkrir leikmenn Columbus Crew voru veikir fyrir tapleik liðsins á móti Pachuca í fyrra.

Marsch segir þessi veikindi ekki vera nein tilviljun og var mjög pirraður yfir því að þrír landsliðsmenn Whitecaps væri veikir fyrir leik liðsins á móti Úkraínu.

„Þeim líður betur núna,“ sagði Marsch um leikmennina Ali Ahmed, Sam Adekugbe og Jayden Nelson.

„Þeir eru samt ekki tilbúnir í níutíu mínútur. Mér finnast óboðlegt að þetta gerist annað árið í röð og þeir komist upp með það að eitra fyrir MLS leikmönnum fyrir úrslitaleik Meistaradeildarinnar,“ sagði Marsch.

„Þetta er fáránlegt. Eitthvað þarf að gera til þess að tryggja öryggi leikmanna í þessum kringumstæðum,“ sagði Marsch.




Fleiri fréttir

Sjá meira


×