Dylan leggur blátt símabann á tónleikagesti

Sólrún Dögg Jósefsdóttir skrifar 11. júlí 2025 10:42

Tónleikagestir Dylans neyðast til að njóta augnabliksins. EPA

Bandaríski tónlistarmaðurinn Bob Dylan hefur tilkynnt um strangt símabann á tónleikaröð sinni á Bretlandseyjum og Írlandi. Tónleikagestum verður gert að koma símunum sínum fyrir í læsanlegum pyngjum sem ekki verður hægt að opna fyrr en að tónleikum loknum.

Tónleikaröðin Rough and Rowdy Ways, sem Dylan hefur ferðast með síðustu fjögur ár, heldur áfram síðar á árinu. Rokkarinn setur stefnuna á þrettán áfangastaði víðs vegar um Írland og Bretland.

Aðdáendur verða þó að bíta í það súra epli að geta ekki birt myndefni af tónleikunum á samfélagsmiðla í rauntíma.

Pyngjurnar sem um ræðir læsast sjálfkrafa þegar inn í tónleikasalinn er komið. EPA

Í frétt Mirror um málið segir að símarnir verði ekki teknir af tónleikagestum, heldur verði þeim gert að koma þeim fyrir í svokölluðum Yondr-pyngjum, sem læsast sjálfkrafa þegar í tónleikasalinn er komið, en hægt er að opna þá á vissum svæðum utan rýmisins.

„Við erum stolt af þeirri leið sem við höfum farið með því að halda tónleikunum símalausum til þess að varðveita þá nánd sem verður til þegar tónlist er í lifandi flutningi,“ hefur miðillinn eftir framkvæmdastjórn tónleikanna.

Tónlist Samfélagsmiðlar Bretland Írland