„Nú eruð þið farin að draga mig aftur inn í pólitíska um­ræðu“

Bjarni ræddi við Ásu Ninnu Pétursdóttur og Svavar Örn Svavarsson á léttu nótunum í Bakaríinu á Bylgjunni og fór yfir lífið eftir stjórnmálin, karaókí og barferðir þingmanna. Bjarni hætti á þingi í byrjun árs og lét af formennsku í Sjálfstæðisflokknum í mars eftir langan feril í stjórnmálum. Hann hefur nú í fyrsta sinn í yfir tuttugu ár einungis fylgst með þinginu úr fjarlægð.

„Þetta hefur nú verið mikið átakaþing og það fór ekki fram hjá neinum. Kannski óþarflega mikil átök að mínu mati. Það hefur auðvitað alltaf þurft að semja um þinglok og það sem mér fannst sérstakt við þetta þing var það að ríkisstjórnin kemur allt allt of seint með risastórt mál,“ segir Bjarni og vísar þar til veiðigjaldsfrumvarps atvinnuvegaráðherra.

„Það er í gildi starfsáætlun á Alþingi um það hvenær þú getur komið málum að og gamla reglan er sú að ríkisstjórn sem vill klára mál þarf að vita það að hún þarf að koma snemma með þau mál en þetta mál sem var aðalágreiningsefnið kom mánuði of seint miðað við reglurnar. Svo er það bara sett í forgang og það verður auðvitað til þess að uppskera ríkisstjórnarinnar er jú að þau fá á endanum það mál samþykkt en annað situr á hakanum, uppistaðan að öllu öðru og mér finnst mjög sérstakt að horfa á að stjórnarandstöðunni sé kennt um það vegna þess hver aðdragandinn er.“

„En nú eruð þið farin að draga mig aftur inn í pólitíska umræðu og ég ætlaði bara að tala um silungsveiðar eða eitthvað svoleiðis,“ bætir Bjarni við. „Ég get nú bara alveg viðurkennt það að ég sakna þess ekkert sérstaklega að vera niðri á þingi.“ Stemningin þar síðustu mánuði hafi kannski haft einhver áhrif þar á en einnig sú staðreynd að hann var búinn að vera þar í yfir tuttugu ár.

„Þannig að mér fannst líka bara vera komið gott.“

Tók breytingunni fagnandi

Bjarni segir það hafa tekið smá tíma að kúpla sig út og venjast því að vera kominn úr stjórnmálunum.

„Maður varð aðeins eirðarlaus til að byrja með en ég var ekkert lengi að njóta þess að vera ekki með dagskrá.“

Þrátt fyrir að hann hafi tekið ákvörðun um að draga sig úr stjórnmálum í byrjun árs hafi honum ekki fundist hann vera almennilega hættur fyrr en Guðrún Hafsteinsdóttir tók við sem nýr formaður Sjálfstæðisflokksins á landsfundi í byrjun mars.

„Þá fann ég fyrir þessari tilfinningu að það hefði raunverulega átt sér stað breyting. Þá var ég búinn að ganga frá öllum formlegheitum og var ekki með neitt í dagbókinni sem var dálítið nýtt fyrir mig. Ég vissi oft ekki nákvæmlega hvað ég var að fara að gera þegar ég lagði af stað á morgnana og svo skolaði manni heim klukkan sjö eða átta á kvöldin og hafði verið að alveg stanslaust allan daginn. Þannig að það er mikil breyting en ég fagna þeirri breytingu,“ sagði Bjarni í Bakaríinu á Bylgunni.

Þessu hafi fylgt mikið frelsi til að rækta áhugamálin og ferðast um landið á nýja bandaríska GMC pallbílnum. Hann hafi keyrt bílinn um 6.500 kílómetra á sjö vikum, farið í flesta landshluta og einnig farið út í fjölda utanlandsferða.

Dagskráin samt stöppuð

„Ég hef getað sagt nánast alls staðar þar sem ég hef farið með fólki við einhver góð tilefni, í útreiðartúrnum um daginn og svona: „Heyrðu, hérna væri ég ekki ef ég hefði verið á þinginu.“ Ég hefði ekki verið í gönguferðinni á Hornströndum. Ég hefði ekki verið í hjólreiðaferðinni eða í mörgum af þeim ferðum sem ég hef farið.“

„Já, ég er búinn að vera að rækta áhugamálin mjög vel og nánast gert allt sem ég kann, spilað meira golf heldur en uppsafnað síðustu tíu ár, þó að ég hafi ekkert spilað neitt sérstaklega mikið. Þannig að ég hef verið að njóta þess að gera þessa hluti sem maður hafði áður ekki svigrúm til þess að gera. Og það ótrúlega er að dagskráin er einmitt af þeim sökum alltaf stöppuð upp á nýtt, bara af öðrum áhugamálum og öðrum hlutum, samverustundum með fjölskyldunni og svona,“ bætir Bjarni við.

Það sé frelsandi að þurfa ekki lengur að ákveða hluti mjög langt fram í tímann. „Það er bara frábært.“

Á sitt lag í karaókí

Þegar talið berst að uppáhalds karaókí-lagi Bjarna segist hann hvorki vera tónviss né með góða söngrödd.

„Ég er alveg skelfilegur söngmaður en auðvitað reyni ég þegar ég fæ míkrafóninn og lagið sem ég reyni gjarnan við þegar er verið að skemmta sér með karaókígræjum er Oh Darling með Bítlunum,“ segir Bjarni léttur. „Ég get ekki flutt það mjög vel en þetta er gott lag.“

Söngur hafi einnig komið við sögu í óvæntri ferð hans með formönnum Viðreisnar, Miðflokksins og Flokks fólksins árið 2018.

„Ég man eftir einni skemmtilegri ferð. Þá hafði átt sér stað stjórnarskrárvinna formanna flokkanna á Þingvöllum og við höfðum ákveðið að safnast saman í færri bíla í stað þess að vera hver að koma á sínum austur.“

Vakti athygli á Álfinum sportbar

Bjarni segir að þegar vinnu formanna lauk á Þingvöllum hafi verið farið í kvöldferð og svo hafi Þorgerður Katrín Gunnarsdóttir, formaður Viðreisnar, Sigmundur Davíð Gunnlaugsson, formaður Miðflokksins, og Inga Sæland, formaður Flokks fólksins, farið í bíl með Bjarna þegar þau yfirgáfu Þingvelli.

„Við hækkuðum svona aðeins í græjunum á leiðinni í bæinn og það fór að myndast sú stemmning þarna þegar við vorum að nálgast Mosfellsbæ að við hlytum nú að kíkja á einn bar áður en við færum hvert til síns heima og það var náttúrlega úr að við stoppuðum á [Kaffi] Áslák,“ segir Bjarni og heldur áfram:

„Það var reyndar enginn þar inni þegar við komum en við fengum okkur einn drykk þar og þegar því var lokið þá var svona: „Þetta var nú ekki alveg nógu gott sko. Það var enginn þarna einhvern veginn og tökum kannski einn drykk áður en við förum heim“ og það varð úr að við fórum á Álfinn í Lóuhólum [í Breiðholti].“

„Þar var margt fólk og eiginlega fullt hús og það var lifandi tónlist uppi á sviði og klukkan hefur verið svona tíu eða eitthvað svoleiðis og það leið ekki á löngu þar til að Inga Sæland hafði kjaftað sig upp á sviðið og var komin með míkrófóninn og söng þar hástöfum. Það var ekki karaókíkvöld en hún söng þar af sínum myndarskap, glæsilega og var með mikla frammistöðu þarna.“

Á sama tíma hafi Bjarni verið staddur á barnum og maður nokkur furðað sig á því hvað formaður Sjálfstæðisflokksins væri að gera inni á sportbarnum. Bjarni segir að skömmu síðar hafi formennirnir ákveðið að koma sér heim.

Hlusta má á viðtalið við Bjarna í heild sinni ofar í fréttinni.