Sögu­leg rappveisla í Laugar­dalnum

Viðbrögðin hafa verið gríðarlega góð og skrifaði Einar Bárðarson, sem var meðal tónleikagesta, meðal annars að framtíðin í tónlist og tónleikahaldi væri björt.

Birnir skaust upp á stjörnuhimininn árið 2017 og hefur gefið út fjórar plötur. Sú síðasta, Dyrnar, kom út í sumar og hefur notið gríðarlegra vinsælda. Birnir var viðmælandi í Einkalífinu í vor og má sjá viðtalið við hann í heild sinni hér. 

Ásamt Birni kom fram úrvalslið tónlistarfólks og má þar nefna Alaska1867, GDRN, Bríeti, Pál Óskar, Joey Christ, Flóna, Danil, Aron Can, Herra Hnetusmjör, Biggi Veira, Sturla Atlas, Gísla Pálma og fleiri. Danshöfundurinn Stella Rósenkranz sá um danshönnun fyrir nokkur atriði og dansarar frá Dansstúdíó World Class skinu skært. 

Það er enginn vafi á því að þetta er einn stærsti íslenski rappviðburður sögunnar og fór allt gríðarlega vel fram að sögn skipuleggjenda. 

„Viðbúnaður staðhaldara og tónleikahaldara var mikill. Í samstarfi við viðbragðsaðila, lögreglu og slökkvilið var virk vakt frá báðum aðilum gestum og gæslu til halds og trausts. Má áætla að allir gestir hafi gengið glaðir frá borði. 

Sömuleiðis er vert að nefna aukaviðbúnað í tölu starfsfólks og rýmisteikningar sem buðu uppá gott flæði gesta að öllum svæðum og salernum, sem lykilatriði í gífulega vel heppnuðum viðburði,“ segja skipuleggjendur tónleikanna. 

Hér má sjá vel valdar myndir frá kvöldinu eftir ljósmyndarann Markús Orra: