Gjör­breyttar kröfur og vinna ekki lengur að­eins til að hafa í sig og á

Sigrúnu er tæknin ofarlega í huga og segir stöðuna í dag og næstu misseri einkennast af hröðum tæknibreytingum.

Ýmislegt annað teljist þó til.

„Það eru kröfur um breytta stjórnun, breyttar kröfur starfsmanna, breyttar kröfur til færni og hæfni og starfsumhverfi er breytt miðað við það sem áður var,“ segir Sigrún.

Í ofanálag séu fyrirtæki að takast á við áskoranir um aukna framleiðni og arðsemiskröfu og nú jafnvel yfirvofandi stríðsástandi.

„Mannauðsmálin á komandi árum munu hins vegar að mestu snúast um að sameina tvo heima: hinn stafræna og hinn mannlega með því að ná til sín rétta starfsfólkinu með réttu hæfnina og halda því.”

Mannauðsdagurinn verður haldinn í Hörpu föstudaginn 3. október. Uppselt er á viðburðinn en dagskrá Mannauðsdagsins má sjá HÉR.

Mannauðsdagurinn er stærsti viðburður mannauðsfólks á Íslandi og hann sækja að jafnaði mörg hundruð manns. Í tilefni Mannauðsdagsins, fjallar Atvinnulífið um mannauðsmálin í dag og á morgun.

Gríðarleg tækifæri

Sigrún segir gríðarleg tækifæri felast í breytingum. Að því leytinu séu tækifærin einkar mörg fyrir komandi tíma og ár.

Sigrún nefnir þar þrjú atriði sérstaklega.

Fyrst tæknina.

„Gervigreindin og sjálfvirknivæðing bjóða upp á möguleika til að losa okkur undan endalausri pappírsvinnu og flóknum ferlum. Þær krefjast skýrra leikreglna um gagnsæi og siðferði,“ segir Sigrún en spyr:

„Hvernig getum við samþætt þessa ferla án þess að tapa mannlega þættinum, sanngirni og trúverðugleika?“

Þá nefnir Sigrún það tækifæri sem felst í því að auka á lífsgæði, ánægju og gleði starfsfólks.

Hugsa þarf um líkamlega, andlega og félagslega velferð starfsmanna. Starfsmenn verða að tilheyra hópnum og upplifa að á þá sé hlustað og þeir viðurkenndir. 

Starfið er ekki lengur það að hafa ofan í sig og á.“

Loks er það sveigjanleiki og jafnvægi milli vinnu og einkalífs.

„Fjarvinna, sveigjanlegur vinnutími, vinnutímastytting og opin vinnurými krefjast nýrra leiða til stjórnunar og samskipta. Þetta er áskorun fyrir stjórnendur sem þurfa að viðhalda menningu, tryggja samskipti og halda uppi framleiðni,“ segir Sigrún.

Dýrmæt tól og innblástur

Sigrún segir mikinn styrk í því fólginn að Ísland er lítið samfélag með ýmiss góð sérkenni eins og að hér ríki traust, jafnræði og nánd.

„Ef við nýtum tæknina til að létta á ferlum en verjum mannlegu snertingu og tengslin í okkar litla samfélagi þá getum við byggt upp vinnustaði sem eru bæði samkeppnishæfir og manneskjulegir,“ segir Sigrún.

Sem telur þrennt skipta mestu máli þegar kemur að áherslum í mannauðsmálum fram undan.

Þessi þrjú atriði eru:

• Ný og breytt hæfni og færni: Byggja þarf upp menningu þar sem starfsmenn læra sífellt nýja færni, bæði tæknilega og mannlega. Það að ráða eftir raunverulegum hæfileikum frekar en prófgráðum tel ég að muni breytast, styðja þarf við endurmenntun og styttri námsleiðir starfsmanna og byggja þannig upp sveigjanlegan vinnumarkað sem nýtir mannauðinn til fulls.
• Gagnadrifin mannauðsstefna: Með nýrri og breyttri tækni munu mælingar verða auðveldari sem og aðgangur að mikilvægum gögnum sem auðvelda og einfalda ákvarðanatöku. Hvort heldur um starfsfólk fyrirtækjanna sem og reksturinn.
• Leiðtogar framtíðarinnar: Forystan byggir ekki lengur eingöngu á stefnumótun og skipulagi. Hún krefst “mannlegrar færni” og leiðtogahæfni í breytingum. Hún krefst samkenndar, trausts og mannlegra gilda – færni sem engin vél getur tekið yfir. Við erum að tala um nýja kynslóð stjórnenda. Stjórnenda sem hafa gögn sem hægt er að taka betri ákvarðanir út frá og leggja áherslu á opin samskipti og heilbrigða mannlega fyrirtækjamenningu.

Sigrún segir löngu uppselt á Mannauðsdaginn eins og hin fyrri ár. Svo vinsæll er þessi viðburður orðinn. Dagurinn gefi í senn innblástur og fræðslu.

Enda segir hún félagið Mannauð hafa stækkað, styrkst og þroskast hratt á síðustu árum.

Við höfum sýnt fram á að fagleg mannauðsstjórnun er lykilinn að samkeppnishæfni íslensk atvinnulífs. 

En við viljum rannsaka meira, safna markvisst mikilvægum gögnum sem sýna fram á að fagleg mannauðsstjórnun styrkir stöðu atvinnulífsins og taka virkan þátt í mótun atvinnustefnu þjóðarinnar.“

Um stemninguna sem myndast alltaf í kringum Mannauðsdaginn segir Sigrún:

„Á hverju ári fáum við til okkar úrval fyrirlesara, bæði innlenda og erlendra til að fræða okkur um helstu nýjungar og það sem hæst ber hverju sinni í faginu. Eins hvað hefur reynst vel og hvað síður vel og þannig fá ráðstefnugestir nýjar hugmyndir og góð ráð sem eru dýrmæt tól í verkfærakistuna þeirra.“