Allt upp á tíu hjá Elínu Klöru

Sävehof vann öruggan sigur gegn Aranäs í þriðju umferð sænsku úrvalsdeildarinnar í dag, 40-32, á heimavelli sínum.

Elín Klara hélt uppteknum hætti og varð markahæst hjá Sävehof með átta mörk, þar af þrjú úr þremur skotum af vítalínunni.

Sävehof hefur þar með unnið alla þrjá deildarleiki sína til þessa og Elín Klara verið markahæst í þeim öllum.

Þar að auki varð Elín Klara markahæst í báðum leikjunum gegn Benfica, sem Sävehof vann, í 2. umferð undankeppni Evrópudeildarinnar og áður hafði liðið unnið fimm leiki í sænska bikarnum.

Frammistaða Elínar Klöru gefur góð fyrirheit fyrir HM sem hefst í næsta mánuði en Ísland mætir þar Þýskalandi í fyrsta leik í Stuttgart 26. nóvember.