Innbrotum og þjófnuðum fækkar
Innbrotum, þjófnuðum og umferðarslysum í umdæmi Hafnarfjarðarlögreglunnar hefur fækkað á fyrstu fjórum mánuðum ársins samanborið við sama tímabil áranna 2000 til 2004. Eignaspjöllum og umferðaróhöppum, þar sem ekki verða slys á fólki, hefur á hinn bóginn fjölgað nokkuð. Þetta kemur fram í bráðabirgðatölum frá lögreglustjóranum í Hafnarfirði. Fíkniefnamálum hefur einnig fjölgað og telur lögreglan það vera af völdum aukinnar áherslu sinnar á þann málaflokk.
