Sálin hans Jóns míns er komin á kreik aftur, eftir sjö mánaða orlof.
Um nýliðna helgi fór sveitin í raun hringferð um landið. Þá flugu Sálverjar til Akureyrar á föstudegi, héldu þar tvenna tónleika, þaðan á Norðfjörð og flugu loks aftur til Reykjavíkur í bítið á mánudaginn.
Greinilegt var að áhangendur voru orðnir Sálarþyrstir, því hvarvetna var leikið fyrir sneisafullu húsi. Um helgina heldur sveitin sig öllu nær heimahögum og treður upp á Players föstudagskvöld og í Stapanum Njarðvík laugardagskvöld. Þessum síðsumartúr lýkur formlega í Laugardalshöll 15. september, en þá slá Sálverjar upp stórtónleikum með fulltingi Gospelkórs Reykjavíkur.
