Rafael Benitez, knattspyrnustjóri Liverpool, segir að Peter Crouch verði ekki seldur frá félaginu í janúar, en hinn hávaxni framherji hefur þráfaldlega verið orðaður við sölu frá Liverpool upp á síðkastið, eftir að hann missti byrjunarliðssæti sitt í hendur Craig Bellamy.
“Ég er mjög ánægður með þá framherja sem ég hef úr að velja. Ég ætla ekki að selja Crouch. Við erum í fjórum keppnum og þurfum á öllum okkar framherjum að halda. Mér dettur ekki einu sinni í hug að selja hann,” sagði Benitez hreinskilinn við enska fjölmiðla. Benitez segir að tími Crouch muni koma.
“Kuyt og Bellamy hafa spilað mest að undanförnu og það hefur gengið vel. En ég veit að Crouch verður tilbúinn þegar kallið mitt kemur,” segir Benitez.”
