Rússneskur bílaframleiðandi í Formúlu 1
Sportbílaframleiðandinn Marussia í Rússlandi hefur keypt vænan hlut í Virgin liðinu breska, sem er stýrt af auðkýfingnum Richard Branson sem á Virgin flugfélagið og yfir 400 önnur fyrirtæki. Í ljósi þessara kaupa þá verður liðið endurskírt og mun heita Marussia Virgin Racing á næsta keppnistímabili. Fréttin kemur skömmu í kjölfar þess að Bernie Ecclestone tilkynnti að Formúlu 1 mót yrði i Rússlandi árið 2014. "Fyrsta ár okkar í Formúlu 1 var erfitt og það var ljóst frá upphafi og ekki síst þar sem því var komið á laggirnar í kreppunni", sagði Branson, eigandi og yfirmaður Virgin um málið í frétt á autosport.com. "Virgin er hæstánægt sem fyrirtæki að hafa tryggt samstarfsaðila sem hefur sömu sjónarmið og anda og við. Markmiðið verður að takast á við þá sem hafa ráðið ferðinni í Formúlu 1 og þróa lið okkar", sagði Branson. Marussia er ekki þekkt merki á heimsvísu, en framleiða m.a. bíla sem líkja má við Ferrari, Lamborghini og álíka sportbíla á markaðnum. Einn rússneskur ökumaður er í Formúlu 1, en það er Vitaly Petrov hjá Renault. Annar rússneskur ökumaður, Mikhail Alesshin fær prufu með Renault í Abu Dhabi eftir Formúlu 1 mótið sem verður þar um helgina. Margir ungir ökumenn munu þá fá tækifæri að prófa Formúlu 1 bíla með hinum ýmsu keppnisliðum.
