Veiðiflugur með hnýtingarnámskeið í janúar

Nú eru veiðimenn farnir að telja niður til 1. apríl en þá hefst veiðin á þessu herrans ári 2012. Margir veiðimenn nota skammdegið til að hnýta leynivopnin fyrir komandi sumar og það er ekki hægt að lýsa því í fáum orðum hvað það er gaman að setja í fisk á sínar eigin flugur. Til opna þennan heim fyrir þá sem vilja læra að hnýta sínar eigin flugur ætlar Hilli í versluninni Veiðiflugur á Langholtsvegi að vera með hnýtingarnámskeið sem byrja núna í janúar í samstarfi við hinn snjalla veiðimann og hnýtara Óskar Pál Sveinsson.

Byrjendanámskeið: Þar verður farið yfir öll helstu grunnatriðin í fluguhnýtingum. Byrjað verður á einföldum silungapúpum, síðan farið í straumflugur og svo endað á laxaflugum.

Framhaldsnámskeið: Kennt verður að hnýta flóknari laxa og silungaflugur. Einnig verða hnýttar túpur, bæði sökkvandi túpur og gáratúbur.

Námskeiðin fara fram í versluninni Veiðiflugur, Langholtsvegi 111 og verða öll tæki og tól á staðnum.

Einn af þeim sem kemur til með að leiðbeina er Sigurberg Guðbrandsson leiðsögumaður og hnýtari með afbrigðum.

Skráning á námskeiðin er hjá Veiðiflugum.