Urriðar að gefa sig þegar veður leyfir

Þær fréttir berast að veiðimenn hafi náð litlum árangri á bökkum Minnivallalækjar það sem af er. Drekarnir eru vissulega á svæðinu en veður hefur sett strik í reikninginn. Á vef Strengja segir frá því að meistari Nils Jörgensen var við veiðar í lok apríl og lentu í ævintýrum eitt síðdegið, en sátu lengst af heima í húsi slagviðrisrigningar eða snjókomu. Í bréfi frá Nils kemur fram að hann landaði 82 sentímetra urriða. Félagi hans hafði landað 74 sentímetra fiski og slitið úr öðrum. Annar hafði landað tæplega 6 punda fiski og einnig slitið úr risa. Sá þriðji hafði rétt upp tvo króka í baráttu við stórfiska.

Það hefur verið erfitt í Minnivallalæk í vor í kuldanum en þó hafa menn sett í hann einstöku sinnum. T.d. var Nils Jörgensen þar á ferð í lok apríl og hittu vel á það eina síðdegisvaktina, en aðra daga sem þeir voru fóru þeir varla út úr veiðihúsinu vegna veðurs.

Þeir sem vilja reyna sig við stórurriðana í Minnivallalæk geta komist til veiða í maí, en farið er að þrengjast um í júní og júlí. Nálgast má veiðileyfi hérna.

Af öðrum veiðisvæðum Strengja segir svo frá á heimasíðu: „Það mátti byrja að veiða 1. maí silung í Breiðdalsá en þar hefur verið lítið stundað frá opnun, en þó hitti Súddi staðarhaldari vel á hana um miðja síðustu viku. Þá var hann ásamt einum öðrum veiðimanni á morgunfjörunni og náðu þeir að  landa 13 sjóbleikjum og settu í mun fleirri svo hún er allavega mætt á svæðið. Annars lítur mjög vel út með vatnsbúskap í Breiðdalsá í sumar því snjóalög þar í fjöllum eru meiri en sést hefur í mörg ár og ætti að vera nóg vatn megnið af komandi sumri. Eitthvað er laust á topptíma seint í júlí, þar á meðal heilt holl 23-26 júlí sem er einstakt og fyrstur kemur fyrstur fær.“

svavar@frettabladid.is