Laxinn í forrétt

Ég hitti á ágætan félaga minn sem er duglegur að veiða í ám og vötnum landsins, bæði lax og silung en einhverja hluta vegna finnst mér hann ekki alveg nógu duglegur viað að elda fiskinn sem hann veiðir.

Hann fer með mest af laxinum í reyk og graf enda er ekki smurð samloka á hans heimili nema annað hvort áleggið sé á brauðinu.  Silunginn er hann duglegur að gefa fjölskyldunni í kringum sig og svo grillar hann eitthvað sjálfur.  Þessi ágæti maður varð á vegi mínum í gær og talið barst að jólamatnum, eða öllu heldur vandræðagangnum í kringum hann.  Það var búið að ákveða eftirréttinn, sígildur Ris A La Mande, í aðalrétt var það hreindýralund af dýri sem hann felldi í sumar, en vandræðin voru með aðalréttinn.  Ég benti honum á að með fulla kistu af reyktum laxi gæti hann gert forrétt sem er bæði góður og einfaldur.

Þú notar í hann reyktan lax, um það bil 100 grömm á mann, kannski aðeins meira.  Klettasalat, ferska myntu, mangó, jarðaber, kiwi og granateplafræ.  Sósan er sýrður rjómi og þeyttur rjómi til helminga, smá salt, smá pipar, dill, kóríander og pínu kúmen.  Ávextina í salatinu þarf að skera nokkuð smátt en satalið er bara aðeins að skera í það, nema granateplafræin, það þarf ekkert að gera við þau.  Salatinu er blandað saman í skál og það má standa aðeins.  Á meðan gerir þú sósuna sem er sáraeinföld.   Rjómunum blandað saman og kryddum bætt í eftir smekk.  Laxinn er steiktur á pönnu, bara í mínútu á roðinu og 20-30 sekúndur á flakinu, alls ekki mikið meira en það fer þó aðeins eftir þykkt flaksins.  Prófaðu einn bita og sjáðu hvernig steikingin er best fyrir þinn smekk.  Svo er þessu raðað pent á disk og svo einfalt er það.

Hann þakkaði mér fyrir og var nokkuð brattur og glaður yfir því að geta loksins prófað eitthvað nýtt í forrétt og ég brosandi yfir því að geta hjálpað honum.  Þetta er nefnilega lúmskt góður forréttur.