Hítará komin yfir 60 laxa

Þrátt fyrir úrhellisrigningu, hávaðarok og oft litað vatn er Hítará í fínum málum en þar eru komnir rétt yfir 60 laxar á land.

Þetta er fín byrjun í ánni og það má vænta þess að veiðin fari vel á flug næstu daga þegar vatn tekur að sjatna með minni úrkomu.  Nokkuð af laxi er farinn að dreifa sér vel um ánna og veiðimenn verða sífellt varir við fleiri göngur í hana.  Síðasta holl í ánni lauk veiðum með 19 laxa en þeir voru flestir yfir 70 sm og sá stærsti var 85 sm sem fékk þann heiður að vera dreginn á land af Formanni SVFR Árna Friðleifssyni.  Næstu daga á loksins að draga úr rigningu og við það fer laxinn að skila sér af meiri krafti í árnar og veiðitölur hækka samfara því.  Það er þó eitt vonarljós við þessa vætutíð sem hefur gengið yfir landið síðustu vikur en þetta hefur haft mjög góð áhrif (augljóslega) á vatnsbúskap og grunnvatnsstöðu sem gerir það að verkum að minni líkur eru á að árnar hrapi í vatni þó svo að það komi þurrkatími í einhverjar vikur.  Það er nefnilega fátt eins niðurdrepandi og vera staddur við ánna sína á góðum tíma þegar hún rennur varla milli hylja.