Grosjean: Lotusbíllinn verður betri á næsta ári

Romain Grosjean, annar ökumanna Lotus liðsins segist sannfærður um að liðinu takist að hanna betri bíl fyrir næsta tímabil.

Eftir að hafa átt góðu gengi að fagna árið 2013 hefur það sem af er 2014 verið afleitt. Grosjean hefur gert liðinu ljóst að hann vilji bíl sem getur keppt um fyrsta sæti. Líklegt þykir að Lotus skipti yfir í Mercedes vélar fyrir næsta tímabil en Renault vélin hefur valdið gríðarlegum vandræðum í ár.

„Ég er 99,99% viss um að liðið geri betur á næsta ári, svo ég minnist ekki á vélina. Þetta hefur verið erfitt tímabil þar sem við byrjuðum illa og reyndum að byggja ofan á lélegan bíl en á næsta ári horfir til betri vegar. Hvort sem við skiptum um vélaframleiðanda eða ekki,“ sagði franski ökumaðurinn.

„Stundum er þetta erfitt því ég hef mikið keppnisskap og vil vinna keppnir, berjast í fremstu röð og ég vil að hlutirnir gangi betur. Stundum ganga þeir ekki sem skyldi en þá tekur maður því og rembist áfram,“ hélt Grosjean áfram.

Grosjean gaf það út fyrir sumarfrí að hann hugðist velta því fyrir sér hvar hann vill aka á næsta ári. Hugsanlega er hann með einhver tilboð á borðinu og gæti því mögulega verið á förum frá Lotus. Sérstaklega gæti hann verið að hugsa sér til hreyfings ef hann sér ekki fram á að bíllinn verði samkeppnishæfur á næsta tímabili.

„Ég held að þetta lúri alltaf í kollinum á manni. Ég vil fara að vinna keppnir fljótlega og við erum að vinna í því. Auðvitað hugsa ég um framtíðina… ég mun gera það í sumarfríinu,“ sagði Romain Grosjean.