Force India frestar frumsýningu enn frekar

Force India liðið hefur staðfest að 2015 bíll þess verði ekki notaður fyrr en í síðustu æfingalotunni.

Liðið var að vona að verksmiðju liðsins tækist að koma bílnum saman fyrir aðra æfingalotuna. Það tekst ekki en hún hefst 19. febrúar. Liðið mun þó mæta til æfinga og notast við bíl síðasta árs. Liðið missti alveg af fyrstu æfingunum í Jerez.

Þessi tíðindi blása lífi í orðróm um að liðið gæti verið í fjárhagsvandræðum. Efasemdir um að liðinu takist að vera með á tímabilinu aukast í kjölfarið.

Aðstoðarliðsstjóri Force India, Bob Fernley hefur gefið það skýrt út að liðið verði tilbúið til keppni í Ástralíu þegar að því kemur. Þrátt fyrir erfiða byrjun á tímabilinu.

„Við verðum í Melbourne þegar tímabilið byrjar, það þarf ekkert að efast um það. Já, bíllinn verður lítið prófaður, en við erum að gera allt sem mögulegt er til að tryggja að við mætum til Ástralíu í þokkalegu formi og með eins mikið prófaðan bíl og mögulegt er,“ sagði Fernley í samtali við Autosport nýlega.