Arrivabene: Bottas meðal margra sem hafa haft samband

Liðsstjóri Ferrari, Maurizio Arrivabene segir marga ökumenn hafa haft samband við sig með það fyrir augum að aka fyrir Ferrari í náinni framtíð.

Kimi Raikkonen, annar ökumanna Ferrari liðsins hefur átt erfitt uppdráttar undanfarið. Orðrómur er á kreiki um að hann fái ekki sæti hjá liðinu á næsta ári. Samningur hans er opinn eftir tímabilið og verður hugsanlega endurnýjaður.

Sögusagnir hafa einnig blómstrað um að Valtteri Bottas, ökumaður Williams liðsins sé á óskalista Ferrari. Meira að segja hefur heyrst að Ferrari vilji borga Williams til að losa Bottas undan samningi sem bindur hann út næsta tímabil.

Arrivabene segir marga ökumenn hafa leitað til sín með von um að krækja í sæti Raikkonen. Bottas er á þeim lista samkvæmt Ítalanum.

„Ferrari bíllinn er sá sem alla dreymir um að aka, en það eru aðeins tvö sæti og bæði eru full,“ sagði Arrivabene.