Íslendingaliðið AIK frá Svíþjóð náði góðum úrslitum í fyrstu umferð forkeppni Evrópudeildarinnar í fótbolta þegar liðið gerði 2-2 jafntefli við finnska liðið VPS.
Þetta var fyrri leikur liðanna og fór hann fram í Finnlandi. AIK hefur því tvö útivallarmörk með sér í seinni leikinn sem fer fram á heimavelli liðsins í Stokkhólmi.
Haukur Heiðar Hauksson spilaði allan leikinn í vörn AIK en hann er á sínu fyrsta tímabili sem atvinnumaður eftir að hafa spilað áður með KR.
Útlitið var þó ekki alltof bjart fyrir Hauk Heiðar og félagar eftir rúmlega klukkutímaleik þegar staðan var orðin 2-0 fyrir VPS.
Fyrra markið skoraði Admir Catovic á þriðju mínútum í uppbótartíma fyrri hálfleiks en það seinna skoraði Bandaríkjamaðurinn Jordan Akil Seabrook á 65. mínútu.
Nabil Bahoui minnkaði muninn fyrir sænska liðið á 70. mínútu og bætti síðan við sínu öðru marki úr vítaspyrnu þrettán mínútum síðar.
Haukur Heiðar og félagar lentu 2-0 undir en náðu jafntefli
