Má bjóða þér súkkulaðimola úr tómum konfektkassa?

Á morgun er komið að hinum umdeilda Valentínusardegi. Mörgum hér á landi finnst þetta óskaplega klisjulegur og óþarfur dagur. Af hverju þurfa Íslendingar þennan dag til að minna sig á ástina þegar við höfum okkar eigin bónda- og konudag? O jæja, sjálf hef ég svo sem ekki sterka skoðun á þessu en er þó á því að við erum of sjaldan minnt á það að láta fólkið í kringum okkur vita að við elskum það. En hvað með okkur sjálf, væri nú bara ekki aldeilis frábært ef tekið væri upp á því að vera með einn svona sjálfshátíðardag? Jafnvel heila helgi, þar sem að við gerum eitthvað fyrir sjálfið.

Allt byrjar og endar hjá okkur sjálfum. Það er erfitt að gefa ástinni sinni súkkulaðimola úr tómum konfektkassa, er það ekki? Eins er það þegar sálin er tóm eða næringarsnauð þá getum við lítið gefið af okkur til þeirra sem við elskum mest. Við þurfum að byrja á því að rækta okkur sjálf til þess að geta gefið sem mest af okkur og þar með búið til betra samfélag.

Ég mæli með því að hver og einn sem les þennan pistil velji sér einn sjálfselskudag og haldi hann hátíðlegan ár hvert, eruð þið til í það? Hér koma nokkrar tillögur að því hvað hægt er að gera í tilefni dagsins;

1. Byrjaðu daginn á að horfa á þig í speglinum og hrósa þér; hrósa þér fyrir það sem gengur vel og prófaðu að segja ég elska þig við spegilmyndina. Sjáðu hvað gerist, var þetta óþægilegt? Hégómalegt? Láttu þig hafa það, lokaðu augunum, dragðu djúpt andann og andaðu rólega frá þér. Opnaðu augun og prófaðu að segja það aftur, núna án allra tauma og gagnrýni. Var þetta ekki betra?

2. Í dag ætlarðu að hugsa fallega til þín eins og þú værir að hugsa til þinna nánustu. Hrósaðu þér í huganum og klappaðu þér á bakið. Áfram þú! Andaðu neikvæðum hugsunum út og jákvæðum inn, finnurðu þetta?

3. Í dag er líka á bannlistanum að gagnrýna aðra á neikvæðan hátt. Það virðist stundum vera þannig að þeir, sem gagnrýna aðra mest og finna að öllum öðrum, líður verst sjálfum í eigin skinni. Vertu kærleiksbjörn í mannsmynd, prófaðu það.

4. Hlúðu að líkamanum, farðu út að ganga, í ræktina eða í nudd og sýndu líkamanum þínum hvað þér þykir vænt um hann. Þú færð það margfalt til baka.

5. Keyptu þér blóm, þau fegra heimilið og gefa af sér dásamlegan ilm auk þess sem þau gleðja augað og sálina.

6. Notaðu tækifærið og fyrirgefðu sjálfum þér. Fyrirgefning gerir okkur frjáls úr þeim fjötrum sem við höfum oft á tíðum sjálf sett okkur í.