Skoðun

„Þjóðhetjurnar“ - Óður til strákanna okkar á EM

Ívar Halldórsson skrifar
Þegar okkar landsmenn vinna dáðir á erlendri grundu er við hæfi að heiðra þá með einhverjum hætti. Strákarnir okkar hafa svo sannarlega vakið heimsathygli með seiglu sinni, hugprýði og hetjuskap á EM. 

 Hátterni þeirra og drengskapur hefur verið til fyrirmyndar á mótinu og ég verð að viðurkenna að ég er mjög stoltur af þeim. Það er ekki á hverjum degi sem maður fyllist af einhvers konar yndislegri þjóðarást - en svo sannarlega er ég stoltur af því að vera Íslendingur í dag í ljósi afreka strákanna á EM.

 Þessi óður er mín leið til að þakka strákunum okkar, og að sjálfsögðu einnig Gumma Ben, fyrir frábæra og jákvæða landkynningu og fyrirmyndar frammistöðu á EM-mótinu: 

 Þjóðhetjurnar

 Skunda þeir frá skrýtnu skeri

 Skotfastir og skeleggir

 Drengir dáðir

 Í EM skráðir

 Massaðir sem múrveggir

 Hræðast hvorki hót né hæðni

 Hrikalega hógværir

 Hvergi smeykir

 Klárir, keikir

 Engir vegir ófærir

 Víkingar á völdum velli

 Virtir, vænir, vongóðir

 Heilla heiminn

 draga ei seiminn

 Hæverskir og hugmóðir

 Hannes Halldórs hvergi hopar

 hetja klár í harkinu

 Fram sig leggur

 Eins manns veggur

 Martröð manna í markinu

 Gummi Ben er göldrum gæddur

 Geðshræringu glittir í

 þegar liðið

 eftir miðið

 hornið marksins hittir í

 Hetjurnar okkar skjótt hrifu heiminn

 Nú hugur margra á heima hér

 Með lúðra og fána

 syngjum "Öxar við ána"

 Guðs Ísland, nú enginn mun gleyma þér

 (Höfundur: Ívar Halldórsson)

Ívar Halldórsson

Mest lesið


Skoðun

Skoðun

32 dagar

Magnea Gná Jóhannsdóttir skrifar

Sjá meira


×

Mest lesið