Pogba mætir til æfinga hjá Juventus á mánudag

Hinn eftirsótti Paul Pogba mun mæta til æfinga með Juventus á mánudag, en hann hefur verið mikið í umræðunni í sumar.

Pogba hefur verið í fríi í Bandaríkjunum undanfarna daga eftir Evrópumótið í Frakklandi á meðan umboðsmaður hans Mino Raiola hefur reynt að selja hann fyrir rúmlega 100 milljónir punda til Man. United.

Samkvæmt heimildum Sky Sports fréttastofunar er allt að verða klárt milli félagana og Jose Mourinho, stjóri United, sagði í gær að félagið væri að gera allt hvað það gæti til að loka leikmannahópnum sem fyrst.

„Hann mun æfa í Vinova (æfingarsvæði Juventus) á mánudag," sagði Massimo Allegri, þjálfari Juventus, í samtali við fjölmiðla.

Tímabilið á Ítalíu byrjar eftir tvær vikur, en þeir spila æfingarleik við West Ham á sunnudag á nýja leikvangi West Ham.

Mourinho hefur nú þegar náð að krækja í Eric Bailly frá Villareal, Henrikh Mkhitaryan frá Dortmund og Zlatan Ibrahimovic frá PSG.