Eftir sigur á Walmart mótinu um síðustu helgi komst So Yeon Ryu frá Suður Kóreu í efsta sæti heimslistans í golfi í fyrsta sinn.
Hún er fyrsti kylfingurinn á LPGA mótaröðinni í ár til að vinna fleiri en eitt mót. Hún vann einnig fyrsta risamót ársins, ANA Inspiration, eftir bráðabana við Lexi Thompson frá Bandaríkjunum.
Ryu er eðlilega bjartsýn fyrir KPMG LPGA Championship en sagði að flatirnar á Olympia Fields vellinum væru virkilega erfiðar við að eiga og mikilvægt að eiga ekki pútt niður halla á flötunum.
Með lengdina á vellinum sagði hún að oft væri leikið á lengri völlum en samt væri karginn meiri hér og því mikilvægara að hitta brautir í upphafshöggum. Hún hafði einnig orð á því að erfiðir vellir hafi ekki verið vandamál hjá henni hingað til þar sem hún hafi bætt teighöggin mikið og væri síður í vandræðum eftir þau.
Hún hafði einnig orð á því að Inbee Park meistari á PGA Championship mótinu 2013, 2014 og 2015 hafi hjálpað henni mikið við að bæta ákvarðanatöku á vellinum.
So Yeon Ryu hefur leik 18:40 í dag. Sýnt verður frá mótinu á Golfstöðinni í dag og hefst útsending klukkan 16:30.
