Nóg af laxi en vantar bara vatn

Sólarglaðir Íslendingar fagna þessum sólríku dögum sem nú leika við landann en það er annar hópur manna sem kýs frekar góða rigningu.

Sumarið er búið að vera blautt og heldur kalt svo það fagna því flestir að fá loksins góða daga sólar og yls.  Veiðimenn aftur á móti sem eiga daga framundan fagna því ekki að fá þetta veður enda verða árnar sem eru dragár hratt vatnslitlar og heitar í þessu veðri og það er ekki mjög spennandi að veiða í því.

Dalirnir hafa sem dæmi fengið afskaplega litla rigningu í sumar og er það farið að bitna á veiðitölum úr ánum þar á svæðinu.  Það vantar ekki lax í árnar, það má glögglega sjá þegar helstu hyljirnir eru skyggndir en það er hratt fallandi vatn.  Laxá í Dölum er ein af þessum ám þar sem laxgengd í sumar hefur verið með mestu ágætum en það er alveg farið að vanta hressilega rigningu á svæðinu til að lyfta henni aðeins uppþ  Veiðin hefur þó verið ágæt þrátt fyrir erfiðar aðstæður.  "Síðasta holl í Laxá í Dölum landaði 66 löxum á fjórar stangir á þremur dögum. Mikill vaxandi hefur verið í göngum og áin orðin nokkuð þétt af laxi. Hins vegar mætti alveg fara að rigna í Dölunum, en ljóst er að það stefnir í veizlu þegar að vætutíð gerir fyrir vestan" sagði Haraldur Eiríksson hjá Hreggnasa.  Veiðimenn sem eiga daga á næstunni eru því ekkert sérstaklega spenntir yfir þessu veðri.