Aflahæstu árnar flestar yfir veiðinni í fyrra

Nýjar vikutölur frá Landssambandi Veiðifélaga voru birtar í gærkvöldi og á þeim má sjá að heilt yfir gengur veiðin víða ágætlega og er yfir veiðitölum sama dags í fyrra.

Þverá og Kjarrá eru eins og í síðustu viku hæstar á listanum með 1238 laxa og þar á eftir kemur Miðfjarðará með 1202 laxa.  Norðurá hefur skilað 966 löxum og Ytri Rangá 902 en þar eru loksins komnar hressilegar göngur.  Blanda er svo í fimmta sæti með 745 laxa.  Vikuveiðin í ánum sem eru efstar er góð en síðasta vika í Þverá og Kjarrá skilaði 237 löxum á land og er veiðin nú 85 löxum meiri en á sama tíma í fyrra.  Vikuveiðin í Norðurá var 172 laxar og er heildarveiðin þá orðin 86 meiri en í fyrra.  Aðrar ár með vikuveiði nálægt og yfir 200 löxum voru Langá með 199 laxa og Blanda með 231 lax.  Vikuveiðin í öðrum ám var minni.

Í samanburðartölum virðist þetta sumar stefna í að verða yfir meðallagi í ánum á vesturlandi en það er ennþá of snemmt að segja um hvernig þetta lítur út í ánum fyrir norðan en þær fá flestar sínar smálaxagöngur á næsta straum með einhverjum undantekningum þó. Vatnið í ánum á vesturlandi er mjög gott og með reglulegri vætutíð það sem eftir lifir sumars tryggir væntanlega að það verði ekki jafn miklir þurrkar og í fyrra þegar árnar voru margar hverjar í minnsta vatni sem þær hafa verið í í 10 ár.

Næsti stórstraumur er 24. júlí og með honum koma síðustu stóru göngurnar í árnar á vesturlandi og það er beðið eftir þeim með nokkurri eftirvæntingu.  Sérstaklega má nefna sem dæmi Hítará en þar hefur vantað allann kraft í göngurnar þó svo að nokkuð af laxi sé gengið en það hefur lítið bólað á fallegum torfum sem setjast síðan í Breiðuna og sýna sig gjarnan mikið.  Heildarlistinn yfir aflahæstu árnar er í heild sinni inná www.angling.is