Manchester United er komið áfram í 16-liða úrslit Meistaradeildar Evrópu eftir 2-0 sigur á Benfica á Old Trafford í A-riðli í kvöld. United hefur unnið alla leiki sína í riðlinum.
Mile Svilar, 18 ára markvörður Benfica, átti viðburðarríkan fyrri hálfleik þar sem hann varði vítaspyrnu Anthonys Martial og skoraði svo sjálfsmark. Skot Nemanjas Matic fór þá í stöngina, bakið á Svilar og í netið.
Svilar varð bæði yngstur (18 ára og 65 daga gamall) til að verja víti og skora sjálfsmark í sögu Meistaradeildarinnar.
Enska liðið sýndi ekki sínar bestu hliðar í leiknum í kvöld og David de Gea þurfti tvisvar að taka á honum stóra sínum. Þá átti Raúl Jiménez skot í stöngina á marki United í seinni hálfleik.
Á 78. mínútu fékk United aðra vítaspyrnu. Að þessu sinni fór Daley Blind á punktinn og skoraði af öryggi. Lokatölur 2-0, United í vil.
United komið áfram í 16-liða úrslit
Tengdar fréttir
Setti tvö met í fyrri hálfleik
Hinn 18 ára Mile Svilar átti afar viðburðarríkan fyrri hálfleik gegn Manchester United í A-riðli Meistaradeildar Evrópu.
