Tottenham kastaði frá sér sigrinum á Ítalíu

Tottenham kastaði frá sér sigrinum gegn Inter í fyrstu umferð Meistaradeildarinnar. Tottenham tapaði 2-1 eftir að hafa komist í 1-0.

Staðan var markalaus í nokkuð tíðindalitlum fyrri hálfleik og það var á 54. mínútu sem fyrsta markið leit dagsins ljós. Það voru gestirnir frá Englandi sem komust yfir.

Daninn Christian Eriksen skaut þá að marki Inter, boltinn fór í gegnum þvögu og í netið framhjá varnarlausum Handanovic í marki Inter sem hefði þó mögulega átt að gera betur.

Jöfnunarmark Inter var af dýrari gerðinni en það kom á 86. mínútu. Eftir fyrirgjöf Kwadwo Asamoah barst boltinn á vítateiginn þar sem Mauro Icardi kom á fleygiferð og hamraði boltann í netið.

Glæsilegt mark og dramatíkin átti eftir að verða enn meiri því í uppbótartíma skallaði Matias Vecino boltann í netið eftir hornspyrnu.

Lokatölur 2-1 sigur Inter en grátlegt fyrir Tottenham að kasta þessu svona frá sér.

Inter og Barcelona eru því með þrjú stig en Tottenham og PSV eru án stiga.