Isavia beitti stöðvunarheimild á grundvelli loftferðalaga á flugvél WOW air, sem staðsett var á Keflavíkurflugvelli, eftir að fregnir bárust af því í nótt að flugvélar WOW air færu ekki frá Bandaríkjunum aftur til Íslands.
Þetta kemur fram í tilkynningu frá Isavia. Þar segir að stöðvunarheimildinni hafi verið beitt á vél WOW air til tryggingar á ógreiddum notendagjöldum.
„Isavia harmar það að WOW air hafi hætt rekstri enda hefur félagið flutt fjölmarga farþega um Keflavíkurflugvöll síðastliðin sjö ár og verið mikilvægur hlekkur í velgengni Keflavíkurflugvallar og uppbyggingu ferðaþjónustu á Íslandi.
Það er ljóst að brotthvarf WOW air mun hafa áhrif á rekstur Keflavíkurflugvallar. Isavia mun á næstunni fara yfir hver þau áhrif kunni að verða.
Starfsfólk Isavia á Keflavíkurflugvelli mun aðstoða farþega WOW air eftir bestu getu í dag og næstu daga,“ segir í tilkynningunni.
Isavia beitti stöðvunarheimild á flugvél WOW í Keflavík
Tengdar fréttir
WOW air heyrir sögunni til
WOW air hefur hætt starfsemi að fullu.
WOW air stöðvar allt flug
Allt flug WOW air til og frá landinu í dag hefur verið stöðvað.
Viðbragðsáætlun stjórnvalda hefur verið virkjuð
Þetta staðfesti Sigurður Ingi Jóhannsson, samgönguráðherra, í samtali við fréttastofu áður en ráðherrafundur hófst í Stjórnarráðshúsinu í morgun.
